Областной центр
народного творчества

«Наурыз –думан, Наурыз – той» атты мерекелік іс-шара орталық алаңда өткізілді. Жер аяғы кеңіп, көктемнің ұлық мерекесі –Наурыз да келіп жетті. «Ұлыс оң болсын ! Ақ мол болсын !» деген баталы сөздерден бастау алатын мейрамның игілігі мен қуанышы ерекше. Тамырын тереңіне жайған осынау мереке тазалық пен татулықтың, береке мен бірліктің тұғырын нығайтып, адамдарды шаттық пен қуанышқа кенелтеді. Ұлыстың Ұлы күнін бірлігі бекем қазақ халқы биыл да толағай табыс, тоқ көңілмен қарсы алды. Ел- жұрт ағарған ішіп, арқа –жарқа болды, жер –жерде ақшаңқан киіз үйлер тігілді. Ұлттық құндылықтар ұлықталып, дәстүріміз дәріптелді. Мейірім мен молшылықтың, жақсылық пен жасампаздықтың мерекесін ел халқы тұтас тойлады.

 Ұлық мейрам – Ұлыстың Ұлы күнін аудан тұрғындары да өзіндік сән –салтанатымен атап өтті.Ерекше мерекенің қызығын көруге аудан орталығына ағылған халықтың қарасы мол болды. Күннің салқындығы көптің мерекелік көңіл – күйіне қаяу түсіре алмады. Күн сәскеге таяна орталық алаңға жұрт лық толды. Жуанның жіңішкеріп, жіңішкенің үзілер шағында ағайынның бір –біріне деген ықыласы ыстық. Орталық алаңның жоғарғы жағын бойлай қонған ақшаңқан киіз үйлер, асулы турған қазан ошақтан шыққан түтін ертедегі қазақ ауылының тұрмыс тіршілігін еске салғандай. Әр отаудың сәні мен сыны, безендірілуі әртүрлі, бас сұққан көпшілікке ұсынған ас-суы мәзірі де бір –біріне ұқсамайды. Дастарға дәстүрлі сусын «Наурыз көжеден» бастап, ұлттық тағамдар –жент, майсөк, құрт, бауырсақ, палау, еттен жасалған қаза –қарта, басқа да жеңсік астар молынан қойылды. Мәдениет үйінің алдында аудан мекемелері тіккен палаткалар да қазан басынан ыстық бауырсақты, Наурыз көжені, палауды тегін үйлестіріп жатты.Бір сәтте алаңға ат мінген  жаршылар шығып сүйінші сұрап, жыл басы Наурыз келгенін хабарлады. Мерекенің басты кейіпкері – Қыдыр ата дүйім елді аузына қаратып, қос білегін көтеріп, халыққа ақ батасын жолдады. Аудан тұрғындары мен қонақтарын Наурыз мерекесімен құттықтап, қуанышына ортақтасу үшін  аудан әкімі Бақтияр Көпбосынов сахна төріне шығып аудан жұртшылығын көктемнің ең көркем де асқақ мәртебелі мерекесімен шын жүректен құттықтай келе, «Ұлыстың Ұлы күні достық пен татулық насихатталып, ақ тілектер айтылды. Халқымыздың тарихымен сабақтас осынау мерекенің мән –мағынасы өте зор. Наурыз мейрамы бірлігіміз бен татулығымыздың, салт –дәстүріміздің, тіліміз бен дініміздің дамуына себепші ұлы мерекеге айналып отыр. Егеменді елімізде бір шаңырақ астында өмір сүретін халықтың бірлігі мен татулығы нығайып, еліміздің көк байрағы биіктерден көріне берсін! Бақ пен дәулеттің мерекесі –Наурыз мейрамы әр отбасына амандық –саулық әкелсін!» деген тілек білдірді. Әрі қарай мерекелік шара аудан орталығындағы орта мектептердің өнерпаздары әзірлеген концерттік бағдарламамен жалғасты. Олар кезекпен шығып қосыла ән шырқап, би билеп, мерекелік сауықты тамашалауға жиналған көрерменге көтерікі көңіл күй сыйлады. Қазақтың «Қара жорғасы», кавказ халқының «Лезгинкасы», өзбектің мың бұралған билері биленіп, салт дәстүрден көріністер көрсетілді. Мерекелік шараға арнайы шақырылған Қазақстан Республикасының мәдениет қайраткері, сазгер, жыршы термеші Бейбіт Шонбаев «Наурыз» термесін орындап берді. Дәстүрлі мерекеге қолөнар шеберлері де белсене атсалысты. Қазақы ою –өрнекпен кестеленген киімдер, бұйымдардың көрмесі көпшілік назарына ұсынылды. Шара барысында ұлттық спорт ойындары да қағыс қалмады. Бозбалалар білектесу, асық ату, арқан тартыс сынды ойындарға қатысып, күш сынасып бақты. Ерекше мерекеде ұлттық ойынның бір түрі- қошқар көтеріден жарыс болды. Сахна аңында сейіл құрған топтың бәсін қыздырғаны да осы болуы керек. Жарысқа салмағы 80 келі тартатын қошқар тігілді. Сайыс ережесі бойынша қошқарды иыққа салған азамат бір орында отырып- тұрып мойныдағы жүгін барынша көбірек көтеруі тиіс. Күш сынасуға шыққан белі бекем, иығы мықты, қарулы азаматтар аз болмады. Көтере алмай құлап, жұртты күлдіргендер де кездесіп қалып жатты. «Күш атасын танымайды» дегендей, бас жүлде –қошқарды 41 мәрте үздіксіз көтерген түйе палуан Терс ауылының тұрғыны Нұрсұлтан Райқұловтың жетегінде кетті. Алаңның бір бұрышында кәсіпкерлердің бастамасымен ұйымдастырылған сауда қатарларында да сауда –саттық көрігі қызып жатты.  Орталық алаңда көпшіліктің ойын-сауығы көпке дейін тарқамады.