«Көне Тараздан - Асқақ Астанаға» этнографиялық керуен
2017 жылдың 21 маусым күні Мойынқұм ауданының Кеңес ауылында, Мойынқұм ауданының әкімдігі мен Тараз иновациялық-гуманитарлық университетінің ұйымдастыруымен «Көне Тараздан - Асқақ Астанаға» этнографиялық керуенді қарсы алу іс – шарасы өтті.
8 киіз үй құрылып, алтыбақан орнатылып бие сауу, жүн сабау, ұршық иіру, диірмен тарту т.б. ауылдың тұрмыс – тіршілігі бейнеленді.
Мойынқұмға бет алған түйелерінің шудасы желмен желкілдеген, ұлттық киімдері жарасып, күймелері күмбірлеген көшті Мойынқұм жұртшылығы құрт- майымен құшақ жая қарсы алып, қыз-келіншектер қымыз-шұбатын ұсынды.
Іс-шара барысында «Бесікке салу», «Тұсау кесу», «Тоқымқағар» секілді ұлттық салт-дәстүрлеріміз дәріптелді. Жергілікті өнерпаздармен Тараз өңірінен келген меймандар ән шырқап, елдің көңіл күйін көтерді.
Мойынқұмдықтар ата-бабамыздан мұра болып келе жатқан кең пейіл қонақжайлылықтарын танытып, өнерлерін көрсетіп, керуеншілерге сәт сапар тілеп, ізгі ниетпен шығарып салды.
Керуен Қарағанды аймағына бет алды.
